Aktuell
- Details
- Veröffentlicht am Samstag, 27. Dezember 2025 10:00
Hans G. Glaser © Vroni Glaser
Frohe Weihnacht iwwerall!
von Lisel Regneri
Wann im Turm die Glocke schwingen in dem Schein der Sternepracht,
un Millione Kehle singen, dann is stille, heilge Nacht.
Hunnertdausend Kerze brennen in der gnadevolle Zeit,
dort, wo Mensche sich bekennen, froh zu unsrer Christenheit.
Lichterglanz durchdringt des Dunkel in der ganze weide Welt,
dursch des Kerzelicht-Gefunkel werd die heilisch Nacht erhellt.
Die geheimnisvolle Kunde vun dem klene Kind uff Stroh,
sie geht jetzt vun Mund zu Munde, hier un dort un irschendwo.
Tannebäm mit bunte Glogge, Silwerzeich un Engelshoor,
lossen Kinneratem stocke, immer widder, jedes Johr.
Was fer Glick leicht aus de Aache, groß sin die un kuchelrund
Friede is jetzt in de Daache mit dem Weihnachtsfescht im Bund.
Mach‘, un dummel dich, Fraa Holle, zuck‘re mit gewandter Hand
bliedeweiß wie unser Stolle, rings um uns des ganze Land.
Schiddl kräfdisch mol die Bedde, dass die Flogge wehn im Wind,
wann die Mensche geh‘n zur Mette, zu dem neigeborne Kind.
Soll der Himmel gnädisch breite iwwer uns sein Sesche aus,
un beim helle Gloggeleide Eintracht sei in jedem Haus.
Soll begligge alle Herze jenes Krippsche dort im Stall,
drum entzündet schnell die Kerze, frohe Weihnacht iwwerall.
Quelle: Uff gut pälzisch, Bernhard Bumb Verlag (1982)