Aktuell

Hans-Peter Zinser

Vum Gleischgewischt

De liewe Gott war emol ä paar Daach net do. Känna hot gewisst wu er is. De Petrus is schun ganz närsch worre und hot die Engel gfrocht ob se wissen wu de Herrgott is. Die hänns awer a ned gewisst. "Isch hab kä Ahnung, der hot sisch ned abgemeld" hänn se gsaat. Am Sundach morsche is de Herrgott hääm in de Himmel kumme. "Hear" hot de Petrus gsaat " wu warschd dann du die ganz Woch?"

"Alder loss ma mei Ruh, ich hab e hardi Woch hinner mir. Am siebten Tage sollschd du ruhen - schreibs uff, des kummt jetzt in die Hausordnung." hot de liewe Gott gsaaat un hot sich ins Bett geleggt.

"Alla hopp", hot sich de Petrus gedenkt, "losse isch en halt schloofe."

Am Mondach morsche isses em Petrus zu bleed worre un er hot die liewe Gott geweckt. "Saach emol, was hoschd du dann die ganz Woch gschafft?"

De liewe Gott hot sich im Bett geräkelt un hot gsaat: "Ich hab en neie Planet gemacht, do guck nunner, des blaue do, ich hab en "Erde" genennt".

"Jo alla", hot de Petrus gemäänt, "als ob mir noch en Planet gebraucht hedden."

"Bassemoluff", de liewe Gott war ganz euphorisch, "diesmol hab ich mir rischdisch Miieh gewe. Ich hab des mit System gemacht."

"Des wärs erschde Mol."

"Nä guggemol. Do sin Meere un glei denewe sin Wüschde. Der ganze Planet is im Gleischgewischt. Do sin kalte Regione un e bissl weider drunne sin warme Regione. Do sin reiche Länder un ä Stickl weider sin arme Länder. Gleischgewischt - des is der Trick."

De Petrus hot e bissl genauer hiegeguggt un hot de liewe Gott gfrocht: "Was iss dann des klääne do?"

Jetzt war de Herrgott e bissl verlegen und hot gsaat: "Des is die Palz. Do isses mit mir durchgange. Die Pälzer sin die intelligenteschde, liebenwürdigschde, gutaussehendschde un symphatischsde Mensche uff de Erde. Die Pälzer hänn de beschde Sex un sinn iwwerhaupt die glücklischsde Mensche. In de Palz wachst alles, do kannschd anbaue was du willscht, es trägt Früchte. In de Palz scheint die Sunn und es regnet grad so viel wie`s fa die Frucht gut is."

De Petrus war beeindruckt. "Do hoscht der jo enner gewwe. Awwer was is dann mit deim Gleischgewischt?"

"Mach dir do kenn Kopp", hot de Herrgott gsaat "Glei newwedra is Hessen“.

 

Zusätzliche Informationen